میرا پاکستان کیسا ہو ؟

                        

   میرا پاکستان کیسا ہو!

بچپن کی کہانیوں میں مہربان پری کی تین خواہشات کاتذ کرہ ہم سب نے سنا ہے ۔اگر کسی پاکستانی سے اپنے وطن کے بارے میں خواہش پوچھی جائے تو امید ہے کہ جوابات ان تین جملوں کے ارد گرد ہی ہوں گے                    

                   میرا پاکستان مضبوط ہو!                                                                                                                                       میرا پاکستان خوشحال ہوجائے !                                                                                                                             میرا پاکستان پر امن رہے !

یہ تین خواہشیں محض الفاظ نہیں ہیں بلکہ  ان کے پیچھے حسرتوں کی ایک فہرست ہے جسے یہ تین عنوان دیے گئے ہیں ۔

سب سے پہلے مضبوطی کا سوال اٹھتا ہے جس کے کئی پہلو ہیں     :

                                                                ٭  جغرافیائی          /طبی 

                                                                                                                                                

                                                                    ٭ نظر یاتی 
                                                                                      
                                                                        ٭  تہذیبی        /ثقافتی 

                                                                         ٭  مذہبی/دینی

جغرافیائی    لحاظ سے بھی  دو طرح کی مضبوطی ہے یعنی                                                                                                                                                             بیرونی اور اندرونی

بیرونی سر حدیں جو کارگل سے لے کر بحیرہ عرب تک پھیلی ہوئی ہیں ۔جبکہ اندرونی طور تمام شہری اور قانونی ادارے شامل ہیں۔افواج،   رینجرز، پولیس، شہری دفاع،عدالتیں ، ادارے  جن میں مقننہ، عدلیہ اور             انتظامیہ شامل ہیں ۔ ذخائر کی حفاظت اور توانائی کا حصول اور تلاش  بھی مضبوطی کے اہم نکات میں سےہے۔ماحول کا صاف ستھرا ہونا بھی ایک محفوظ معاشرے کی پہچان ہے ۔ دہشت گردی ایک بہت بڑا چیلنج ہے اس کی وجوہات جانےبغیر سد باب ممکن نہیں  ۔ اس میں اہم ترین وجہ بنیادی انسانی ضروریات میں رکاوٹیں  اور غیر ملکی دشمن قوتیں ہیں ۔ انسانی ضروریات میں محض غذا ، لباس اور گھر نہیں ہیں بلکہ ان کا دائرہ علاج، تعلیم ،     تحفظ اور انصاف تک پھیلاہوا ہے ۔

پاکستان دو قومی نظریہ کی بنیاد پر وجود میں آیا لہذا اس کے مطابق یہاں قانون سازی ہواور آئین کی شقوں میں اس کا تحفظ ہو !نظریاتی طور پر مضبوط ہونے کی جھلک تہذیبی اور ثقافتی طور پر مطمئن اور پر اعتماد ہونے میں نظر آتی ہے ۔ یعنی طرز رہائش ، رسم و رواج ، تقریبات، تفریح سمیت مکمل آداب زندگی اس کے مطابق ہو ! بھیڑ چال اور دیگر اقوام کی نقالی سے پاک ہو کیونکہ فرد کی طرح ہر قوم بھی منفرد ہے اور اس کا طرز زندگی اس کے حالات ،ضروریات، محل وقوع کے مطابق  ہی ہونا چاہیے۔

پھر بات آتی ہے دینی /مذہبی لحاظ سے مستحکم ہونے کی تو اس کے بھی دو حصے ہیں :                                      

                                                                                                                                                                                                        عقائد و عبادات     اور معاملات

عقائد کے لحاظ سے بین المسالک اور بین المذاہب ہم آ ہنگی نظر آئے ،غیر مذاہب کی تقلید نہ ہو اور بدعات کےمظاہر سے پاک ہو۔

معاملات انفرادی بھی ہوتے ہیں اور اجتماعی بھی ! انفرادی طور پرہرپاکستانی  جسمانی،ا     خلاقی ،رو حانی ،جذباتی ، مادی طور پر مطمئن ہو، معاشرتی معاملات میں حقوق و فرائض کا توازن ہو ،معاشی لحاظ سے ہر ایک کے لیے تسلی بخش روز گار ہو اور آگے بڑھنے کے مواقع ہوں ،سیاسی معاملات میں ہر شہری کو اس کے حقوق میسر آئیں! اس میں آزادانہ ووٹ ڈالنے سے لے کر اپنی پسند کی جگہ رہائش اور کاروبار کی آزادی حاصل ہو!

یہاں تک کی تحریر سے اندازہ ہوا کہ صرف ایک نکتے مضبوطی میں  خوشحالی اور امن خود بخود  سمٹ آ یا ہے ۔یعنی تمام باتیں ایک دوسرے سے منسلک ہوتی ہیں ۔ خوشحالی کا مطلب یہ کہ ہر فرد  کو نصیب ہو ،اور روز گار بھی امن سے مشروط ہے۔

اب سول یہ ہے کہ یہ سب کیسے ہو؟؟؟عملی اقدامات کی شکل کیا ہو؟کون ساکام سب سے پہلے کیا جائے ؟ اس سلسلے میں کچھ عملی کا موں کو نمایاں کیا جارہاہے جن میں سے کچھ انفرادی ہیں ، کچھ معاشرتی طور پرتھوڑی سی محنت ، توجہ اور دلچسپی سے حاصل کر سکتے ہیں، کچھ محض احتیا طوں  اور روز وشب کی تبدیلی سے حاصل ہوسکتے ہیں !  کچھ اداروں کے کر نے کا کام ہے ۔یعنی ہر کام حکومت پر چھوڑنے کے بجائے معاشرے کے بالغ نظر اور باشعور افراد اپنا کردار ادا کریں

تعلیم:                           

                          ہرتعلیم یافتہ کا فرض ہے کہ وہ معاشرے میں تعلیم کے فروغ کے لیے  اپنا فریضہ ادا کرے ۔اپنے ارد گرد پانچ/دس ایسے افراد کو ڈھونڈے جو اس کے معاون بن سکیں ۔ یہ ساتھی نہ صرف مالی معاونت کریں بلکہ نصا بی مدد بھی کر سکیں ،روزانہ دو گھنٹے کا دورانیہ ہو ، تین  بنیادی مضامین پڑھائے جائیں اور انہی کے ذریعے اخلاقی ، روحانی ، معاشرتی  اوصاف کے ساتھ ساتھ کچھ فنی تربیت کا انتظام ہوجو اس کے متعلقہ روز گار میں مدد  گار ثابت ہو ۔اس تعلیمی پراجیکٹ میں فرد کے طبقے  اور ذہنی سطح کو مد نظر رکھا جائے  ۔ ابتدا دس یا کم از کم پانچ افراد / بچوں سے شروع کیا جا ئے ۔چھہ چھہ ماہ کے کریش پروگرام ہوں جن میں استعداد کے مطابق آگے بڑ ھا یا جائے ۔اس کام کے لیے موجودہ دور کی ہر تیکنیک کو استعمال کیا جائےجن میں موبائیل سے لے کر کمپیوٹر انٹر نیٹ ،ملٹی میڈیا ، پراجیکٹر ، آڈیو/ ویڈیو /اسکائپ شامل ہیں ۔ ہر فارغ التحصیل     طا لب علم کی ڈگری کو اس بات سے مشروط کیا جا ئے کہ وہ گائوں اورقصبوں میں جاکرایک مقررہ  مدت کی ٹیچنگ کریں گے۔ 

میڈیا تعلیم کا ایک بہت بڑا ذریعہ ثابت ہوسکتا ہے ۔اس سلسلے میں حکومت پر دبائو ڈالا جا ئے کہ وہ تمام چینلز کو اس بات کا پابند کریں کہ وہ تفریحی دورانیہ مختصر کریں ، تعلیمی اور تر بیتی نشریات ہوں ۔یکساں نظام تعلیم اور قومی زبان میں تعلیم  کی قانون سازی کرکے عملی شکل دی جائے۔ اعلٰی تعلیمی اداروں میں ملک کی حقیقی ضرورت کے مطابق داخلے دیے جائیں ۔ بے مقصد، ادھوری تعلیم سے ملک و قوم کا سرمایہ اور وقت ضائع ہوتا ہے۔آن لائن تعلیمی کریش پروگرامز تیار کر کے پیش کیے جائیں۔ 

ماحول :                           

 ہر فرد کی جسمانی اور ذہنی صحت کے لیے ماحول بڑی اہمیت کا حامل ہے ۔ ماحول کی ستھرائی کے لیے تین آ ر                            

(   REDUCE        , REUSE            , RECYCLE   )

کے فارمولے پر عمل کیا جائے اور ڈسپوزیبل کلچر کو ترک کیا جائے۔ نامیاتی اور غیر نامیاتی کچروں کو علیحدہ رکھا جائے ۔ نامیاتی فضلہ سے کھاد بنانے کا کام لیا جائے ۔ درختوں کے اگانے اور نشوونما پر حوصلہ افزائی کی جائے۔ باغبانی کو مہماتی طریقوں سے نافذ کیا جا ئے۔یہ کثیر الفوائد نسخہ ہے۔ ماحول کی درستگی کے ساتھ ساتھ ، کئی  قسم کے کاروبار کی راہ کھلے گی ، روز گار دستیاب ہوں گے اور غذائی و دوسری مفید اشیاء کی پیداوار میں اضافہ ہو گا ۔نوجوانوں کو تخریبی اور منفی سر گر میوں میں ملوث ہونے سے روکا جا سکے گا ۔ یہاں مالی استحکام رکھنے والوں کو                     روحانی اور دائمی ثمرات سمیٹنے کی خوشخبری کے ساتھ     خرچ کرنے پر  مائل کرنا پڑے گاکہ یہ ان صدقہ جاریہ بنے گا ! اس کے ساتھ نوجوانوں اور فارغ افراد کو بھی متحرک کرنا ہوگا ۔ یہ سارے کام بہت چھوٹی /محلہ کی سطح پر  بآسانی ہو سکتے ہیں ۔  اسی طرح سڑکوں ، گلی محلوں کی صفائی ستھرائی کے لیے بھی انعامات رکھ کر صفائی پر آمادہ رکھا جا ئے، صفائی کا مظاہرہ گھر اور باہر دونوں جگہ نظر آئے۔ کچرا پھیلانے والوں کی حوصلہ شکنی ہو ۔

معاشرتی اقدامات :   

شادی بیاہ اور دیگر مواقعوں پر سادگی کا رواج ڈالا جائے ۔معاشرتی اصلاحات کے لیے محلہ کمیٹیوں  اوربرادری کی سطح پر اقدامات حکومتی قوانین سے کہیں زیادہ موئثر ثابت ہوسکتے ہیں ۔اس معاملے میں خوشحال ، تعلیم یافتہ، اعلیٰ عہدے داران اور صاحب  استطاعت متمول افراد نسبتاً فعال اور بہتر کردار ادا کر سکتے ہیں ۔ ایسی شخصیات  عمومی افراد کے لیے روشن مثال بن سکتے ہیں کیونکہ عموماً  ان کی  بات سنی جاتی ہے اور پیروی بھی کی جاتی ہے۔

غذائی عادات :                               

        
   کسی بھی معاشرے کی غذائی عادات کے اثرات اس  کے انفرادی بجٹ سے لے اجتماعی ماحول تک اثر انداز ہوتے ہیں ۔ بین الاقوامی غذائی تحقیق کے مطابق پاکستانی سبزیوں کا استعمال اپنے معیار سے بہت کمتر سطح پر کرتے ہیں گویا متوازن غذا سے محروم رہتے ہیں اور یہ ہمارا واضح مشاہدہ ہے کہ متمول افراد پروٹین اور شکر کی مقدار بہت زیادہ لیتے ہیں جبکہ غریب افراد بھی جہاں موقع ملے یا دستیاب ہو ایسی ہی غذا استعمال کرتے ہیں ۔ اس معاملے میں صاف ستھرے کھانے کا اہتمام کرنے کی تلقین اور حوصلہ افزائی کی جائے۔ کھانے کے ضیاع کو روکا جائے۔ کچن گارڈن اور کھانے پکانے کے سہل طریقے عام کیے جائیں ۔

توانائی کی بچت اور حصول :

اس سلسلے میں ظاہر ہے حکومتی پالیسیاں  اہم ہیں مگر بہت سے معاملات انفرادی اور معاشرتی سطح پر بھی کیے جاسکتے ہیں مثلاً بہت سے کام جو بجلی کے بغیر ہوسکتے ہوں ، کم فاصلوں کے لیے پیدل چلیں ، شاپنگ اور دیگر امور کے لیے دن کے اوقات استعمال کیے جائیں اور قریبی بازاروں سے استفادہ کیا جائے، کوشش کریں کہ ایک گاڑی میں زیادہ افراد سفر کریں ( یہ باہمی رابطوں اور ضروریات کے لحاظ سے طے کیے جاسکتے ہیں )۔شمسی توانائی اور دیگر دستیاب وسائل کا حصول اور استعمال آسان بنا یا جائے ۔

روزگار :

معاش کی ذمہ داری بنیادی طور پر مرد کی  چنانچہ ہر مردکے لیے اس کی صلاحیت کے مطابق باعزت روز گار ہو ۔اس کے لیے ہنگامی بنیادوں پر ان تمام شعبوں میں مرد وں کو جگہ دی جائےجہاں خواتین کی ضرورت نہیں ہے۔ یہ خواتین کے ساتھ ہر گز زیادتی نہیں ہے بلکہ وہ گھر بیٹھ کر باعزت کام کر سکتی ہیں ۔سب سے بڑھ کر وہ اپنے گھر کو بہتر بنا کر بچوں کی تر بیت کر سکتی ہیں جو آیا ، ٹیوٹر اور ڈے کئیر سے بری طرح متا ثئر ہے معاشرے کے ہر فرد کو ضرور فعال کیا جائے مگر اس کی استطاعت اور صلاحیت کے مطا بق ! بوڑھوں اور بچوں پر ذمہ داریاں نہیں ڈالی جاسکتیں مگر انہیں بھی کچھ نہ کچھ حصہ دار  ضروربنا یا جائے ۔ اس کی بہت سی عملی اشکال ہو سکتی ہیں مثلا باغبانی ،محلے کی صفائی وغیرہ

اختتام :

ایک مضمون کے اندر وہ تما م باتیں نہیں آ سکتیں جو میرے وطن کی خوشحالی ،مضبوطی اور امن کی مکمل تصویر پیش کرے  مگر ایک اجمالی خاکہ ضرور پیش کرتی ہیں کہ میرا پاکستان کیسا ہو ؟ فلاح خاندان کی طرح فلاح مملکت ہمارا مطمع نظر ہو نا چا ہیے !

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

                 فر حت طاہر

                                                                                                                                        

وقت زندگی ہے

 بچے جیسے ہی ٹیوشن اور کوچنگ سے گھر پہنچے ، ان کے لیے ہدایت تھی ۔

" جلدی سے تیا ہوجاؤ ! پھپو کے ہاں جانا ہے منگنی میں ۔۔۔! "

" ابھی سے ؟ صرف ساڑھے چھہ بجے ہیں ؟ "  بچوں کا  احتجاج جائز تھاکیونکہ آج صبح امتحان تھا ۔کل رات سے نیند پوری نہ ہوئی تھی ۔ تھکن سے چور تھے ۔

" بیٹا ! قریبی رشتہ دار کو جلدی پہنچنا ہوتا ہے ۔گھر میں تقریب ہے ۔۔۔! "

بچے بڑ بڑا ہٹ کے باوجود سات بجے  تیار تھے روانگی کے لیے۔ پھپھو کے گھر پہنچےتو وہاں عملا جھاڑو ہی لگ رہی تھی ۔ سب کام میں ان کے ساتھ لگ گئے ۔ تھوڑی دیر میں اور رشتہ دار بھی آ پہنچے ۔ گھر اور گھر والے نک سک سے تیار ہوکر لڑکے کے گھر والوں کے منتظر تھے جو آ کر ہی نہ دے رہے تھے۔ بھوک اور تھکاوٹ کو دبائے سب انتظار کی گھڑیاں گن رہے تھے۔ کھانے کی دیگیں بھی آ پہنچی تھیں اور خوشبو سب کو بے چین کر رہی تھی مگر مہمان خصوصی کے بغیر کھا نا کیسے کھل سکتا تھا؟ دس بجے کے قریب ان کے گھر فون کیا گیا تو معلوم ہوا کہ لائٹ کےآنے کے منتظر ہیں ۔ ساڑھے دس پر آئے گی تو استری ہوگی پھر نکلیں گے ۔۔۔۔آگے کا قصہ بیان کرنا بیکار ہے ! ہم سب تصور کر سکتے ہیں ۔گیارہ بجے کے بعد آمد ، رسم ، کھانا ، سامان سمیٹنا ، ٹریفک جام ۔۔۔یقینا قارئین یہ کہیں گے کہ اس میں کون سی انوکھی بات ہے ! یہ تو آج کا معمول بن چکا ہے !

اصل موضوع پر آنے سے پہلے تھوڑی سی وضاحت کہ عمومی تقریبات جو کلب / ہال وغیرہ میں ہوتی ہیں وہاں تو شرکاء جاتے ہی دس  بجے کے بعد ہیں ،اپنے سارے کام نبٹا کر ،آرام کر کے تروتازہ ہونے کے بعد ،تو ایک ڈیڑھ گھنٹے کی تقریب میں اتنی خواری نہیں ہوتی جبکہ گھر کی تقریب کے بارے میں سوچا جا تا ہے کہ تھوڑے سے لوگ تو وقت کی پابندی سے آ سکتے ہیں مگر جہاں وی آئی پی کلچر کی وبا ہو وہاں ہر کوئی اپنی تقریب کے وقت اس کا مظاہرہ کرنا اپنا حق سمجھتا ہے  اور اگر عمومی مہمان بن کر انتظار کرنا پڑے تو وقت کے ضیاع پر تقریر تیار ہوتی ہے۔۔

اس منظر نامے کو جس سے ہر فرد خوب واقف ہے اور ہر ہفتے نہ سہی ہر مہینے تو ضرور بھگتتا ہے  کئی حوالوں سے بات ہوسکتی ہے   !رشتہ داری کا نیٹ ورک اور اس کا جبر ( خصوصا پھپو ! )   ، رسومات کی بہتات اور تسلط ،  گھروں میں تقریب کی زحمت ،بجلی کی لوڈ شیڈنگ وغیرہ وغیرہ ! لیکن یہ سب ضمنی ایشو ہیں ۔ اصل مسئلہ وقت کی بربادی ہے !اس کا کوئی حل ؟؟

سندھ حکومت نےیکم نومبر سے   دکانوں /بازاروںاور شادی ہالوں کےنظام الاوقات کے  بارے میں تازہ احکامات جاری کیے ہیں  جن پر یا تو خاموشی ہے یا تنقیداور عمل کرنے سے انکار !                                           پچهلی سوئی ہوئ حکومت پر ہم دل بهر کر ٹهٹهول کرتے رہے اب اگر ایک نئے چابک دست حکومت نے کچھ اقدامات کا فیصلہ کیا ہے تواس کی تائید کرنی چاہیے .، خواہ یہ  اقدامات کاسمیٹک ( اوپری )  ہی کیوں نہ ہو ۔اس وقت جو صورت حال ہے کہ

    عملا دن بهر سب بند اور رات کو چمک دمک!

صبح کے اوقات میں ایک عجیب سی منحوسیت اور شام کو یلغار! 
دیکهنا یہ ہے کہ اس کو کس طرح قابل عمل بنایا جاسکتا ہے؟تجاویز کے سلسلے میں کالم کے کالم لکهے جاسکتے ہیں مگر اصل بات قوت عمل کی ہے ! مشاہدہ یہ ہے کہ بہت سے کام زبردستی ٹهونسے جاتے ہیں ، رسمی ہی سہی مگر اس کے کچھ نہ کچھ اثرات معاشرے پر ضرور پڑتے ہیں مثلا ضیا ءالحق کے نظام صلاۃٰ اور سر ڈهکنے کے احکامات کو کتنا ہی غلط استعمال کیا جائے یا مضحکہ بنایا جائے بہر حال اس نے معاشرے میں مثبت روایات کی بنیاد ڈال دی جسے ختم کرنا آسان نہیں ! ہم حکومت کے شاکی،  عدالتوں سے ناراض ، اداروں سے خفا ، عالمی ٹھیکیداروں سے نفرت کا اظہار کرتے ذرا نہیں چوکتے مگر سوچنے کی بات ہے کہ ہم اپنے معاشرے کی اصلاح کے لیے کیا کر سکتے ہیں ؟

اس بات پر  فیسبک  پو سٹ لکھی تو ہماری فرینڈز لسٹ اور ان کے فرینڈز ، جن کی تعداد مل جل کر ہزار کے لگ بھگ ہوگی ان میں سے دس پندرہ نے لائک اور ایک دو نے شئیر کا اور تبصرہ کا حقدار سمجھا ۔۔۔۔اس سے ہماری تر جیحات کا اندازہ ہوتا ہے ۔وقت جو زندگی ہے اور جس کا حساب دینا ہے ، نہ صرف انفرادی بلکہ اجتماعی ! اس کو سلب کرنے والے مشاغل کے بارے میں ہم کس حد تک سنجیدہ ہیں ! اس کی درستگی کے لیے نہ کسی راکٹ سائنس کی ضرورت ہے اور نہ ٹیکنالوجی کی ، نہ کچھ ایکسپورٹ کرنا ہوگا نہ کچھ ٹیکس دینا ہو گا ۔بس اپنی الجھی ہوئی اور بگڑی ہوئی  عادتیں درست کر نی ہوں گی ۔
 حکومت کے بارے میں ہمارے شکوک و شبہات اپنی جگہ مگر بہر حال ہمیں موقعے سے فائدہ اٹھا تے ہوئے بادل ناخواستہ ہی سہی تعاون کرنا چاہیےکیونکہ یہ بات درست ہے کہ ہمارا سب سے زیادہ وقت بازاروں اور شادی ہالوں کے نظام الاوقات کے باعث ضائع ہوتا ہے ۔ ظاہر ہے اس سے سو فیصد بہتری نہیں ہوگی مگر کچھ نہ کچھ برکتیں ضرور نظر آئیں گی ان شاء اللہ !

"رات تو اپنی ہے "کے مقولے پر عمل کرنے والوں سے عرض ہے کہ اسے اللہ نے آرام کے لیے بنا یا ہے ۔ہاں اگر کسی کی جاب کی نوعیت ایسی ہے یا بیمار افراد جن کو رات بھر نیند نہیں آتی باقی لوگوں کو ہر گز اپنی حیاتیاتی گھڑیوں سے کھلواڑ کرنے کی اجازت نہیں دی جاسکتی ! بہتر ہوگا کہ ہم اپنے نظام الاوقات کو سورج اور نمازوں کے لحاظ سے ایڈجسٹ کرلیں !اگر ہم رضا کارانہ طور پر نہیں بدل سکتے تو قوانیں کے تحت ہی تبدیل ہوجائیں ۔کہیں سے تو وقت کے ضیاع کو قابو میں کیا جاسکے تا کہ تعمیری سر گرمیاں اپنی جگہ بنا سکیں ----------------------------------------------

٭ فر حت طاہر ٭

    

Like

Love

Wow

Sad

Bottom of Form

ہوم میکر

                                کس طرح ہاتھ آئے سوز و درد و داغ؟

 

 علامہ اقبال کا یہ مصرعہ سارہ اقبال کے نام!

ٹھہریں! یہ سارہ ہے کون؟

موبائیل کمپنی کے تازہ اشتہار میں کر کٹر بن کرکامیابی حاصل کرنے والی لڑکی جو اپنے ناراض والد کی آواز سن کر بھرے مجمع میں مائیک کے سامنے رو پڑتی ہے۔اس اشتہار کو دیکھ کر آج پورا پاکستان اشک بار ہے! عمومی افراد تو فلمی جذباتیت سے متاثرہ ہیں جبکہ بہت زیادہ اپنی اقدار اور روایات کی تباہی پرلرز رہے ہیں! یہ اشتہار خصوصی طور رمضان میں لانچ کیا گیا ہے!

ایک اشتہار ہی تو ہے یہ! آخر اتنا ہنگامہ کیوں؟  یہ موبائیل کمپنی تو اس سے کہیں زیادہ فحش اشتہار بنا چکی ہے۔ انڈین اداکارہ  ہونابھی کوئی نئی اورانوکھی بات نہیں! پھر کیا مسئلہ ہے؟ اس میں تو ایک مسلمان گھرانہ دکھا یا گیا ہے مذہبی اقدار و عبادات پر چلنے والا اور پھر کرکٹ جو ہم پاکستانیوں کی کمزوری! یہ ہی بات تو تشویشناک ہے!

 شاہنواز فاروقی صاحب نے برسوں پہلے یہ بات کہی تھی کہ اسکرین پر کسی یورپین کو دیکھ کر ہم تسلی دیتے ہیں کہ یہ تو ہمارا کلچر نہیں ہے۔پھر ہندوتہذیب کو دیکھتے ہیں توبھی مذہبی لحاظ سے مختلف محسوس کرتے ہیں۔لیکن جب مسلمان تہذیب میں کچھ دیکھتے ہیں تو اپنائیت سمجھتے ہوئے شرعی طور پرحلال اورجائز سمجھتے ہوئے نقل کرنے اور اپنانے میں عارنہیں سمجھتے اور یہ وہ خطرہ ہے جو مسلمان تہذیب کے لیے خود کشی  کے مترادف ہے۔بالکل یہ ہی بات ایک خاص غیر مسلم گروپ کے بارے میں کہی جاتی ہے کہ وہ اسلامیا صطلاحات استعمال کرنے کی وجہ سے زیادہ خطر ناک ہوتے ہیں۔

اشتہاری کمپنی کو داد دینی پڑ تی ہے نام کے انتخاب پر! سارہ جو بلا تفریق ہر مذہب میں بہت پیار سے رکھا جاتا ہے خواہ ہندو ہو یا مسلمانِ عیسائی ہو یا یہودی! ہر گھر، خاندان اور محلے میں ایک پیاری سارہ ضرور ہوتی ہے جو سب کی آنکھ کا تارہ ہو! مگر موبائیل کے اشتہار میں خصوصی طور پر اسے مسلمان دکھا یا گیا ہے۔ظاہر ہے ایک مسلمان معاشرہ ٹارگٹ ہے خصوصاً مسلمان خواتین اور گھر!

اس اشتہار میں وہ اپنے باپ کو ناراض کر کے ٹریننگ پر جارہی ہے! کیا حقیقت میں ایساہوتا ہے یا ہونا چاہیے؟ کرکٹ کا جنون اپنی جگہ مگر ایک مسلمان سارہ کا یہ شوق کچھ اس انداز کا ہو تا ہے کہ:

٭وہ باپ کی لاڈلی ہے، جب وہ کھیلنے جاتے ہیں تو اسٹیڈیم میں موجود ہوتی ہے،ابو کی کامیابی پر میڈیا کے سامنے پر اعتماد طریقے سے اظہار خوشی کرتی ہے بغیر اس کے کہ کوئی بات مذہب کے منافی ہو! شکست پر تبصرہ کرکے اپنا کھیل سے تعلق ظاہر کرتی ہے مگر اپنی نسوانیت کو داغدار کیے بغیر!

٭بھائی کرکٹ کوچنگ کے لیے روانہ ہوتا ہے تو وہ اس کا بیگ تیار کرتی ہے جو واپسی میں اسے تحائف اور مٹھائی سے بھرا ملتا ہے!

 ٭جب منگیتر کھیل کے میدان میں ہوتا ہے تو چپکے چپکے اس کی کامیا بی کی دعا کرتی ہے کہ سندیسے اس تک ہر صورت پہنچ جاتے ہیں!

٭اور جب وہ بیاہ کر اپنے شوہر کے پاس چلی جاتی ہے تو اس کی فتح کی دعا ہر سانس میں کرتی ہے خواہ اسٹیڈیم میں ہو یا گھر میں! وہ بھی اپنا میڈل اس کے گلے کا ہار بنا دیتا ہے!

٭اور جب  بیٹا کر کٹ کا بلا لے کر میدان میں اتر تا ہے تو وہ اس کے ہر رن پر کئی کئی نفلیں منت مان لیتی ہے کہ وہ بھی تو ماں کو ہر ہر لمحے کی روداد سنا تا ہے!

  یہ سارے روپ قدرتی اور فطری ہیں .....اورجب ان تمام کرداروں کے بجائے  وہ خود بلا لے کر میدا ن میں اتر تی ہے تو سب اتھل پتھل ہوجاتا ہے!اس کی غیر حاضری ہر جگہ ایک خلا ء پیدا کر دیتی ہے! دوسری طرف میدان میں اترنے سے پہلے پہلے سارہ کے ساتھ کیا ہوتا ہے؟   اس کے لیے ملتان کی ایک کر کٹر حلیمہ کی مثال کافی ہے جو چند سال پہلے ماہ رمضان میں ہی خود کشی کر چکی ہے! وجہ کرکٹ عہدہ داران کی ناشائستگی!

اس اشتہار میں ایک خود مختار اور با اختیار عورت کی کر دار سازی سازی خود بخود نظر آ رہی ہے اور یہ ہے پچھلے ڈیڑھ دو عشروں کی سرمایہ کاری کا نتیجہ! جی ہاں! آزاد، اپنے فیصلے خود کرنے والی عورت،زندگی کے ہر پیشے میں نظر آنے والی عورت! اب ایسا ماڈل معاشرے میں بآسانی دستیاب ہے! بہت ہی مخصوص شعبوں میں جہاں لڑکے بھی کم تعداد میں پہنچتے ہیں لڑکیوں کا جوق در جوق داخل ہونا کس بدلتے ہوئے سماجی رویے کا غماز ہے؟ اس پر ایک نظر ڈالتے ہیں!

   دو ڈھائی عشرے پرانی بات ہے کہ یونیورسٹی میں طالبات کے درمیان ایک مبا حثہ تھا بعنوان:

                               عورت گھر اور باہر توازن سے کام کر سکتی ہے؟

 اس بات کی مخالفت / حمایت میں دھواں دھار دلائل دیے گئے۔دونوں طرف پلڑہ برابر تھا۔ججز کو فیصلہ کرنے میں دشواری پیش آ رہی تھی شاید! مگر اس پرایک نو دس سالہ بچی کے تبصرے نے (جو اپنی خالہ یا کسی کزن کے ساتھ آ ئی ہوئی تھی)اس مذاکرے کا رخ متعین کر دیا۔

       ”.....میں چاہتی ہوں کہ جب میں اسکول سے آؤں تو امی گھر پر ہوں ........!“

اس جملے نے واضح کر دیا کہ گھر کی تکمیل عورت کے وجود سے ہوتی ہے۔ یہ ایک جھلک تھی ہمارے اس وقت کے معاشرے کی جب خواتین  صرف تعلیمی یا طبی شعبے میں ہی نظر آ تی تھیں اور اس پر بھی بحث ہورہی تھی کہ اس کے اوقات کار ایسے نہ ہوں کہ گھر متائثر نہ ہو۔اور پھر تبدیلی کی فضا نے ہر طبقے اور ذہنی و معاشرتی سطح کی عورت کو گھر سے باہر دھکیل دیا۔ ائر ہوسٹس اور نر سز پر ہی اعتراضات ختم نہیں ہوئے تھے کہ بسوں اور کوچز میں بھی لڑکیاں میز بانی کرنے لگیں۔ پٹرول پمپوں، ویٹرز سے لے کر سیلز گرلز اور .........وغیرہ وغیرہ! ا ب زندگی کا کون سا شعبہ ہے جہاں خواتین موجود نہیں اور اس کا جواز؟ .عورت سب کچھ کر سکتی ہے!یہ ہے سب سے بڑا دھوکہ ...سراسر غچہ دے کر عورت کو بے حال کیا گیا ہے!جب مرد سب کچھ نہیں کر سکتا (نہ بچے پیدا کرسکتا ہے نہ پال سکتا ہے!) تو عورت پر یہ ظلم کیوں کہ اسے جیک آف آل بنا یا

 جائے! اس حوالے سے آج کی نوجوان لڑکیوں پر بڑا ترس آ تا ہے۔ نسوانیت کا تقاضہ کہ حسن کی حفاظت اور گھر کی سجاوٹ بناوٹ، رشتوں کی سمجھ بوجھ میں وقت گزارے دوسری طرف کیریر اور اس کے لوازمات اس بات پر اکساتے ہیں کہ لڑکوں سے آگے جاناہے تو ان کی طرح حلیہ، بال اوررکھ رکھاؤ اپنا نا ہے! اس چکر میں تیتر بٹیر قسم کی نسل تیار ہورہی ہے! ....

  اس اشتہار کا قابل اعتراض پہلو صرف عریا نی نہیں بلکہ ہمارے معاشرتی نمونہ paradigmکو تبدیل کرنے کی بات ہے۔ کر کٹر کی وجہ سے کر کٹ میں دلچسپی لینے والی لڑکیاں خود بلا لے کر میدان میں آ جائیں تو گھروں کاکیاہوگا جہاں نسل انسانی تیار ہوتی ہے! وہ تو گھر کامر کزہ (نیوکلیس) ہے۔ اس کے گرد دائرے کو توڑ دیا جائے تو کتنی تباہی ہوتی ہے۔ یہ ہے اصل اضطراب کی وجہ! اس سامراجی ایجنڈے کا توڑ کیا اور کیسے کرنا ہے؟

کسی بھی خطرے کے حوالے سے تین قسم کے رویے سامنے آتے ہیں۔کچھ تو طوفان کی پیشگی آمد سے بچاؤ کی تد بیر کرتے ہیں، کچھ طوفان کو قریب آتے دیکھ کر ہنگامی اقدامات کرتے ہیں جبکہ ایک بڑی تعدا د طوفان گزر جانے کے بعد ہوشیار ہوتی ہے! اب دیکھنا یہ ہے کہ ہم کس گروہ سے تعلق رکھتے ہیں!

 ...........................................................................................................................................................

    فر حت طاہر

      

واہگہ سے ریس کورس

22/مارچ کو دوپہر ساڑھے بارہ بجے ہم پنڈی سے لاہور پہنچے تھے۔تھکن سے برا حال تھا۔سامان ہوٹل میں رکھنے کے بعد فریش ہوتے ہی کھانا لگ گیا۔ حالانکہ صاف ستھرا بستر دعوت آرام دے رہا تھا مگر اس کی اجازت نہ تھی کہ دوران سفر کھانے کے مخصوص ہی اوقات ہوتے ہیں ابھی ہم کھانے کے بعد نماز پر ہی تھے کہ عزیزہ نوشین کی آمد کا فون آ گیا۔ ہم اسے ہوٹل کی لوکیشن سمجھاہی رہے تھے کہ وہ استقبالیہ پر پہنچ چکی تھیں اور منٹوں میں کمرے کے اندر!نیچے گاڑی آچکی تھی اور ہم واہگہ جانے کو تیار!                             

واہگہ اسٹیڈیم:

یہ وہ جگہ ہے جہاں پاکستان اور بھارت کی سرحدیں ملتی ہیں۔وہی سرحدیں جہاں دس لاکھ انسانوں کو نظریہ کی بنیاد تہ تیغ کیا گیا تھا۔ اب یہاں روزانہ دونوں ممالک کی پر چم کشائی کی تقریب ہوتی ہے۔و بجے کے بعد ہم واہگہ کی طرف رواں دواں تھے۔خوش گپیوں میں وقت کا پتہ بھی نہ چلا اور منزل پر پہنچ گئے مگر ٹھہریں! ابھی منزل مقصود کہاں؟ ابھی تو ہم وہاں پہنچے تھا جہاں گاڑی چھوڑنا تھی۔ داخلے سے پہلے اپنی حیثیت بتانی تھی۔یعنی پروٹوکول والی یا عمومی؟ چونکہ ہم نے پورا سفر عوامی انداز میں کرنے کا طے کیا تھااس لیے پروٹوکول کی سہولت نہ استعمال کی۔ بلاوجہ انسان قیدی سا محسوس ہوتا ہے!  خیر ہر دو صورتوں میں ابھی کافی مراحل تھے۔

چیک پوسٹوں سے گزرتے ہوئے،بیگز کیچیکنگ، جسمانی چیکنگ، .....اف لگ رہا تھا بھارت میں ہی داخل ہورہے ہیں!خواتین، بزرگوں، بچوں اور معذوروں کے لیے شٹل سروس تھی جبکہ مردوں، لڑکوں کو سارا سفر پیدل ہی طے کرنا تھا۔ ہمارے ساتھ ایک ہی مرد تھے انہوں نے اپنا کارڈ استعمال کرتے ہوئے وی آئی پی انکلوژر میں جگہ حاصل کرلی۔

بالآخر تمام مرحلوں سے گزر کر اسٹیڈیم پہنچے اور اپنی نشستیں سنبھال لیں۔ دیکھتے ہی دیکھتے اسٹیڈیم کھچا کھچ بھر گیا۔ موبائیل سروس جام تھی گویاہمارا رابطہ باہر کی دنیا سے کٹ چکا تھا بلکہ ہمیں اس کی حاجت بھی نہ تھی کہ اب تو جو کچھ تھا یہ ہی منظر اور پس منظر تھا!سامنے ازلی دشمن کی باڑ تھی۔ وہاں بھی محفل سجی تھی مگر جذبوں کا فقدان نظر آ رہا تھا۔ جیسی گہما گہمی پاکستانی انکلوژر میں نظر آرہی تھی یا ہمیں محسوس ہورہی تھی وہاں نہ تھی۔ اگر ہوتی تو وہاں بیٹھے خواتین و حضرات ہم پر اتنی نظریں گاڑے نہ نظر آتے۔ محمد یوسف کو اپنے ابو کے پاس جانے کی ہڑک ہوئی جو عین ہماری نشستوں کے نیچے موجودتھے۔ قریب موجود رینجر کے نوجوان سے کہا مگر نظم و ضبط کی ڈیوٹی پر مامور اس فرد نے صاف انکار کردیامگر تھوڑی دیر بعد مجمع سیٹل ہونے کے بعد ایک اور جوان نے اس کو اپنے ابو تک پہنچا دیا۔

اس وقت تقریب عروج پر تھی۔ ہماری طرف اذان گونجی، تلاوت ہوئی اور جوش و جذبے سے معمور نعرے گونجنے لگے۔ جبکہ سر حد کے اس طرف ڈھول اور باجوں کی آواز ہی نمایاں تھی وہ بھی اذان کی پر سوز صدا میں ڈوب گئی تھی۔ نعروں کے جواب حاضرین پر جوش طریقے سے دے رہے تھے۔ نعرہ تکبیر اللہ اکبر اور پاکستان کا مطلب کیا لا الٰہ الااللہ کی صدا دل میں اندر تک ٹھنڈک دے رہی تھی! دل چاہ رہا تھا کہ اس کی گونج اکھنڈ بھارت کا خواب دیکھنے والے سیکولر عناصر تک پہنچے اور وہ دیکھ لیں کہ حلیہ خواہ کوئی بھی ہو نظریہ بہت گہری جڑیں رکھتا ہے ہم پاکستانیوں کے لیے! تقریب کے دوران بھارتی انکلوژر میں سے ایک لڑکی بھاگتی ہوئی پاکستانی سر زمین میں داخل ہوگئی۔ بھارتی حکام اس مارتے ہوئے واپس لے گئے۔ دیکھ کر دل بہت خراب ہوا۔ شاید اس کا ذہنی توازن ٹھیک نہیں تھامگر ایسی بچی کو حساس علاقے میں اتنے آگے تک لانے کی کوئی وجہ سمجھ نہیں آئی! تقریب کے دوران اور اختتام پر بھارتی خصوصاًسکھ ملحقہ باڑ کے ساتھ کھڑے ہوکر خیر سگالی کا پیغام دیتے رہے جس کا پاکستانی کوئی خاص نوٹس نہیں لے رہے تھے۔یقیناً سب نے قیام پاکستان میں سکھوں کاکردار پڑھا ہوا ہے۔اب اس ڈھکوسلے کی کیا ضرورت ہے! ٹرین بھی رینگتی نظر آئی جی ہاں سمجھوتہ ٹرین!

تقریب کے اختتام پر پر جوش ہجوم یوں باہر نکلا گویا تحریک پاکستان میں حصہ لے کر لوٹا ہو! اسی جذبے کے ساتھ پاکستان کی تعمیر کی جائے تو حالات نہ بدلنے کا کوئی جواز نہیں!یہاں بھی میوزیم موجود ہے جسے ہم نے سر سری دیکھا۔ یہاں ادکار غلام محی الدین معہ فیملی موجود تھے  جن کے ساتھ لوگ فر مائشی سیلفیز بنوا رہے تھے۔ واپسی کا سفر بھی ان ہی رکاوٹوں سے پر ہے!  

ڈوبتے سورج کی آخری کر نیں تھیں جب ہم نے بھی واہگہ چھوڑا۔ ڈھیروں ڈھیر افراد کو جس مستعدی اور پھرتی سے رینجرز یہاں سے روانہ کر رہے تھے حیران کن تھا۔اب یہ فوجی یہاں اکیلے کیا کریں گے؟کسی بچے نے سوال کیا۔ ان کی تو ڈیوٹی ہے یہاں!ساری رونق اور میلہ تو تھوڑی دیر کا  ہوتا ہے۔ ویرانے میں خاموشی سی چھا گئی۔ان کے مزاجوں میں درشتی اور سختی کی وجہ سمجھ آنے لگی تھی۔ ہوٹل پہنچ کر اندازہ ہوا کہ جسم کا ہر خلیہ تھکا ہوا ہے اور آرام کا طلبگار ہے۔آنکھوں میں نیند لیے کھانا کھایااور قصر ادا کر کے بستر پر گر گئے۔

 صبح آنکھ کھلی تو ہنوز تھکاوٹ سے جسم بوجھل تھا۔ مگر آج تو بہت مصروف دن ہے۔گاڑی اور ڈرائیور تیار تھے ہمیں لاہور گھمانے کے لیے۔یہاں گرین بس کی طرز پر گرین رکشے اور گاڑیاں بھی چلتی ہیں۔ہم سب گاڑی میں آبیٹھے۔ سب سے پہلی منزل تو مینار پاکستان ہے!

مینار پاکستان کی سیر:

ڈرائیور نے ہمیں رکاوٹوں کے سامنے اتار دیا۔ابھی سے؟ مینار پاکستان تو بہت دور ہے۔ معلوم ہوا کہ اورنج ٹرین کے باعث کھدائی ہورہی ہے۔ دھول مٹی میں اٹا ہوا مینار پاکستان کہیں فاصلے پر تھا۔ ہم بادشاہی مسجد کی طرف چلے گئے۔نماز کا وقت نہ ہونے کے باوجود مسجد آباد تھی تفریح اور زیارت کرنے والوں سے۔ مغلیہ دور کے اس شاہکار کی ہر اینٹ غفلت اور کوتاہی کا رونا روتی نظر آئی۔قرآن گیلری دیکھی۔مسجد میں دوگانہ ادا کرکے جھروکے میں بیٹھ کر تازہ ناریل کھائے۔ وہاں سے مینار پاکستان نظر آرہا تھا۔ مختار مسعود کی آواز دوست کے اوراق یاد آگئے!  علامہ اقبال کا مزار تو عوام کے لیے بند تھا شاید کسی خاص شخصیت کا دورے کا پروٹو کول تھا۔ وہاں سے نکل کر شاہی قلعے کی طرف روانہ ہوئے۔

پر شکوہ اور پر جلال عمارتیں اوروسیع و عریض سیر گاہیں! اپنا الگ دفاعی نظام! مغلیہ دور سلطنت کی طرز زندگی اور رہائش کا اعلٰی نمونہ نظر آتا ہے۔ شاہی زندگی کے کروفر نگاہوں میں گھوم گئے۔معلوم ہوا کہ آج ۳۲/ مارچ کی وجہ سے یہ عوام کے لیے کھولا گیا ہے ورنہ عموماً بند ہوتا ہے۔ وجہ صاف ظاہر ہے! اس تار یخی اثاثے کی زبوں حالی اور کسمپر سی رلاگئی۔ ڈرائیور کی بات درست لگی کہ ہر اس چیز پر توجہ ہے جس پر اپنا کتبہ لگا یا جا سکے! اب ان چار پانچ سو سال پرانی عمارات کو کون سنبھالے؟ حالانکہ انتظام اور مرمت اور و بحالی کرکے بھی اپنے نام کو تاریخ کے صفحات میں زندہ رکھا جا سکتا ہے۔ تین چار ہزار سال پرانے شہروں کی کھدائی کرکے ٹوٹی پھوٹی مردہ اشیاء تو اتنے کروفر سے سجائی جارہی ہیں اور اپنے زندہ تاریخی نوادرات دیمک زدہ کیے جارہے ہیں!وجہ ہے کہ ان مردہ شہروں کی ذمہ داری تو اقوام متحدہ نے اٹھا ئی ہوئی ہے اور ہم اتنے نادان کہ اپنے اس ورثے کو بھلائے ہوئے ہیں۔ ہونا تو یہ چاہیے کہ یہاں موجود ہر عمارت کو متعلقہ علوم کے شعبے کے صدر دفتر کی حیثیت سے فروغ دیا جائے۔ یعنی ہر شعبے کا طالب علم خواہ دفاعی یا عسکری ہو، مقننہ یاعدلیہ،۔۔۔۔تعلیمی اسناد کے لیے یہاں کا مطالعاتی دورہ ضروری ٹھہرے! تجویز دیے بغیر نہیں رہ سکتے مانے گا کون! یہاں کے سبزہ زاروں میں پیڑوں کے سائے تلے بیٹھ کر ہم نے بھی اپنے آپ کو تصور میں مغلیہ دور کے پائیں باغ میں تفریح کرتے پایا مگر جوس کی ٹھنڈی بوتلیں اورریپر میں لپٹے اسنکس اس منظر میں اجنبی سے لگے۔ قلعے سے باہر آئے تو لگا شاہی قلعے کے دنیا ایک الگ بستی ہے اور شاید اس دور میں بھی ہوگی۔محمد یوسف نے قریب جاکر مینار پاکستان دیکھنے کی ضد کی اور منوں مٹی کھا کر واپس آیا

اب ہمارا رخ عجائب گھر کی طرف تھا۔ یہاں تحریک آزادی اور اس کے حوالے سے نادر تصاویر اور اشیاء دیکھنے کوملیں۔چونکہ بچے ابھی امتحان سے فارغ ہوئے تھے اوربہت سی باتیں ان کو تازہ تازہ یاد تھیں لہذا بہت اچھی طرح سمجھ میں آرہی تھیں۔ مسلم لیگ کے اجلاس کے دوران استعمال ہونے والے چولہے، چائے دان،ٹائپ رائٹراور دیگر اسٹیشنری بہت دلچسپی سے دیکھی گئیں۔کاش جذبات، روایات اور اقدار بھی محفوظ رکھے جاسکتے ان کے تحفظ کا بھی کوئی ادارہ ہوتا! یہاں موجود کچھ چیزیں خون کا دباؤ بڑھارہی ہیں مثلاً ملکہ بر طانیہ کا مجسمہ!س کے سر پر سجا تاج برسوں پرانی بات یاد دلاگیا۔ ....میں لندن جاکر ملکہ سے اپنا کوہ نور ہیرا واپس لے کر آؤں گی جو انگریز یہاں سے چرا کر لے گئے ہیں ....ہم نے فضہ کو ٹٹولا ...اب اسے اتنی عقل آگئی ہے کہ اپنی چیز واپس لینے کا ایک ہی طریقہ ہے تہذیبی فتح!ویسے پچھلے ماہ اس حوالے سے پیش رفت یہ ہوئی ہے کہ لاہور ہائی کورٹ نے ہیرے کی واپسی کے لیے مقدمہ کی منظوری دے دی ہے کہ یہ پنجاب کا ثقافتی ورثہ ہے اور ملکہ بر طانیہ کو کوئی قانونی حق نہیں کہ وہ اس ہیرے کو اپنے تاج میں سجائے! دیکھیں اس مقدمہ کا کیا بنتا ہے؟

یہاں سے نکل کر باغ جناح المعروف لارنس گارڈن گئے۔ سڑک پر ٹریفک اور عوام کا ازدہام بڑھتا ہی جا رہا ہے!  گارڈن میں ڈھیروں ڈھیروں خاندان پکنک منا رہے تھے ہم بھی ان میں شامل ہوگئے۔ کھانا کھا یا۔تھوڑا آرام کیا اور اب ایک نئی منزل کی طرف۔جی ہاں! بہت فر مائشی جگہ یعنی چڑیا گھر! ہم نے یہاں سے بچنے کی بہت کوشش کی مگر بچے بضد تھے۔ سڑک پر ٹریفک اور عوام کا ازدہام بڑھتا ہی جا رہا ہے!  ہم نے سوچاہمارے پاس تو وقت کم ہے اس لیے آج کے دن نکلے مگرمعلوم ہوا کہ یہاں چھٹی کادن تفریح منانے کا  رحجان اور رواج ہے۔مگر افسوسناک بات یہ کہ تقریباتی اور تفریحی کلچر کی شوقین عوام کے سامنے اس دن کی اہمیت واضح نہیں ہے کیونکہ کوئی ایک تقریب بھی اس حوالے سے نہیں نظر آ ئی۔نظریہ پاکستان پر ویسے ہی دھول ڈالنے کی کوشش ہو رہی ہے۔ کاش میلوں ٹھیلوں کی شوقین قوم کو مقصد حیات سے آگاہ کر دے کوئی!

اب ہمارا رخ ریس کورس گراؤنڈ کی طرف تھا۔ یہاں سالانہ ثقافتی نما ئش لگی ہوئی تھی۔یہ بتانے کی ضرورت نہیں کہ بے انتہا رش تھا۔اب تو ویسے بھی شام ڈھل رہی تھی۔تفریح کا باقاعدہ وقت تھا۔ایک طرف مختلف اشیاء کے اسٹالز لگے ہوئے تھے تو دوسری طرف اسٹیج پر پھکڑ بازی ہورہی تھی۔  ہم پہلے ہی اسٹال پر شاپنگ میں مصروف ہوگئے جس سے روکنے کے لیے ہمیں بہت بہلاوہ دینے کی کوشش کی گئی کہ ابھی تو بہت بڑا پارک ہے مگر ہم اس بھرّے میں نہ آئے اور ایک ہی اسٹال پر ٹک گئے۔شاپنگ کی پیاس تو کیا بجھتی،”نہ اٹھا ساغر مرے آگے“کے مصداق ابھی حلق بھی تر نہ ہوا تھا کہ اندھیرا اور تھکن کے باعث واپسی کی راہ لی مگر مصمم ارادہ ہے کہ کل یہیں سے آغاز کریں گے۔رات کو پنجاب کا خاص روایتی کھا نا مزے لے کر کھا یا۔

صبح ناشتے کے بعد پلیٹ فارم کا ٹکٹ لے کر وہاں موجود نیشنل بک فاؤنڈیشن کے اسٹال میں گھس گئے اورد دو ہزار کی کتب خرید لیں مگر آپ یہ سمجھیں کہ ان کی اصل قیمت کہیں زیادہ ہے کیونکہ خاصی نادر کتب ہیں جو اور کہیں دستیاب نہ ہوسکتی ہیں۔ انکوہوٹل میں رکھ کرشاپنگ کے لیے بازار گئے مگر آدھا دن گزرنے کے باوجود ہنوز بند تھے لہذا نا مراد واپس ہوئے۔ گر می کے باعث تفریح کے لیے بھی شام کو نکلنے کا پروگرام بنا یا۔ آج لاہور میں گرمی کا با قاعدہ آغاز ہو گیا ہے ہوٹل میں آرام کرتے رہے۔

شام کے وقت پارک گئے۔بقایا شاپنگ مکمل کی۔باغوں کے شہر لاہور میں پھولوں کی نمائش بھی دیکھی۔شمسی لا ئٹ سے روشن ہوتے کھمبے بڑے بھلے لگے۔ میلہ کی رونق اپنے عروج پر تھی۔ پارک کے سامنے ہاسپٹل دیکھ کر ذہن میں آیا کہ خدانخواستہ حادثے کی صورت میں .....! (فوراً لاحول پڑھی تھی مگر انہونی ہو کر رہی اور ہم دھک سے رہ گئے جب کراچی پہنچتے ہی گلشن پارک میں بم دھماکے کی خبر ملی۔ بہت سے لوگ جو ہماری واپسی سے لاعلم تھے فون پر ہماری خیریت معلوم کرتے رہے) بچوں اور نوجوانوں کو پانی میں کھیلتا دیکھ کر اپنا سمندر یاد آگیا۔ 
رات کو پارٹی میں گئے جہاں سے واپسی اس وقت ہوئی جیسا کہ کراچی کی تقریبات سے ہوتی ہے۔کراچی والے اپنے ہی ٹائم کے مطابق زندگی گزارتے ہیں خواہ بر سوں کہیں اور گزار لیں!
واپس ہوٹل آکر پیکنگ مکمل کی کہ کل واپسی کا سفر ہے۔ ہم بھی تھک چکے تھے اور کراچی والے شاید ہماری کمی محسوس کرنے لگے تھے۔ اپنی قدر گھر سے دور جاکر ہی ہوتی ہے!ویسے یہ جملہ معترضہ ہے کیونکہ موبائل فون کے ذریعے رابطہ ہمہ وقت ہی رہا اور اپنے شہر سے با خبر تو ہم پورے سفر میں رہے۔ خواہ پرویز مشرف کے ملک سے فرار کی خبر ہو یا مصطفٰی کمال کی نوزائیدہ پارٹی کے نام رکھنے کی تقریب! ویسے یہ بات سمجھ نہیں آئی کہ ہمارے حلیے یا لہجے میں کیا بات ہے کہ جس سے بات کرو یہ ہی پوچھتا ہے کراچی سے آ ئے ہیں؟ اور اگلا سوا ل کراچی کے حالات کے حوالے سے ہوتا ہے جو خا صہ مضمحل کردیتا ہے بالکل ایسے جیسے کسی بچے سے اس کے گھر ہونے والی چپقلشوں کا حال پوچھ لے کوئی! بات تو سچ ہے مگر ہے رسوائی کی!
اگلے دن بیس گھنٹے کے سفر کے بعد ڈرگ روڈ اسٹیشن پر اترے تو چلچلاتی گرمی میں مری یاد آگیا۔طویل راشد منہاس روڈ کے دونوں طرف آبادبستیوں کو دیکھااور چن جی گاڑیوں کو دیکھ کر آنکھیں بھیگ گئیں! کیا قسمت پائی ہے ہمارے شہر نے؟پانچ بلند و بالا پلوں سے گزر کر

 جب ہم اپنی منزل پر پہنچے تو لگا اتنی مسافت میں تو دوسرا شہر آجاتا! شہراپنا ہی اچھا لگے خواہ بدنام ہی ہو! کتنا ہی بے ہنگم کیوں نہ ہوجو یہاں یک بار آجائے اس کے سحر سے نہیں نکل پاتاتو ہم جو یہاں کے دائمی باشندے ہیں کس طرح اس سے بے رخی برت سکتے ہیں!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
  فرحت طاہر

ایوبیہ سے خان پور سیر ہی سیر

اگلے دن موسم ابر آلود بلکہ برس ہی رہا تھا مزید کی پیشن گوئی تھی اور سیر کو نکلتے ڈر بھی لگ رہا تھا مگر اللہ کا نام لے کر گاڑی میں بیٹھ گئے۔ہمارا پروگرام مری اور ایوبیہ کی طرف تھا۔بل کھاتے راستوں میں موسم بھی خوبصورت سے خوب صورت ہو تا جا رہا تھا۔ بادلوں کو اپنے درمیاں دیکھ کر عجیب سا احساس ہورہا تھا۔ دل خود بخود خدا کی بزرگی کی طرف مائل تھا جس کے ہاتھ میں کائنات کی کنجیاں ہیں۔ آہستہ آہستہ موسم میں شدت آرہی تھی۔اور برف باری تیزی سے ہمیں دھندلا رہی تھی۔
ایک ہوٹل کے باہر گاڑی روکی۔چھتری کی اوٹ میں ہم سب سنبھل سنبھل کر اترے کیونکہ مستقل برف باری ہورہی تھی۔ نرم نرم برف پر ڈرتے ڈرتے پاؤں دھرتے کیونکہ وہ بہت تیزی سے جم کر سخت بھی ہوجاتی جس میں پھسلنے کا اندیشہ تھا۔ہم اس وقت آٹھ ہزار فٹ کی بلندی پر تھے اور درجہ حرارت منفی آٹھ! یہ ساری تفصیلات ہمیں اپنے سمارٹ فون سے معلوم ہورہی تھی۔ہوٹل والے نے ہمارے لیے چائے کا انتظام کیا اور ساتھ ہی ہاتھ تاپنے کے لیے لکڑیاں بھی سلگائیں۔ دھوئیں سے کالے پڑتے اس ہوٹل کے باہر دودھیا برف میں گھری  لپٹی ہماری گاڑی ایک عجیب امتزاج نظر آ یا۔ خاصی ڈرامائی سی صورت حال تھی۔ سردی سے ہم سب کے ہونٹ نیلے سے ہورہے تھے۔ دل میں اندیشے سے سر اٹھا رہے تھے کہ ہم یہاں ان لوگوں کے رحم و کرم پر ہیں خدانخواستہ.. .۱ وہ بے چارے کراچی والوں کی تعریف میں رطب اللسان تھا اور ہم یہاں سے جلدی نکلنے کی دعائیں مانگ رہے تھے    خوف  اور اندیشے! ایسا نہ ہوجائے ! کہیں یوں نہ ہو وغیرہ وغیرہ  او ر اس وقت ایسے ایسے واقعات یاد آنے لگے جو کبھی کہیں پڑ ھے یا سنے تھے۔برف باری کی خبر ہمیں کراچی سے بھی موصول ہوئی اور برف باری کی اطلاع ملتےہی قرب و جوار کے منچلے پہنچنا شروع ہوگئے تھے۔ اس
!مقام کے کے لیے یہ ایک بہترین موقع ہوتا ہے آمدنی کا

!

ا

اب ہماری واپسی تھی۔ ان ہی موڑوں سے گزرتے ہوئے عجیب سا احساس ہورہا تھا  کہ اب سب شجر و حجر سفید لبادے اوڑھ چکے تھے۔ آبشار کی صورت گر تا پانی ایک خوبصور ت آواز پید اکر رہا تھا۔ہم میں سے اکثریت چکر سے نڈھا ل ہوچلی تھی۔ بیچ میں کئی دفعہ گاڑی رکی تاکہ ہمارے ساتھ ساتھ اس کو بھی آرام ملے! جب ہم اسلام آباد میں داخل ہوئے تو مغرب ہونے والی تھی اور بارش ہو رہی تھی۔  پنڈی پہنچے تو اچھی خا صی  
رات ہوچکی تھی ۔ ہم سب تھکن سے چور ہوچکے تھے لہذا جلد ہی گرم گرم بستر پر دراز ہوگئے۔

ٹیکسلا میوزیم  اور سر کپ کے کھنڈرات :

اب ہفتہ وار چھٹیاں تھیں اورہمارے میزبان نے زبردست تفریحی دورے کا انتظام کیا تھا۔ پہلے تو ہم ٹیکسلا 

میوزیم اور اس سے ملحقہ پارک گئے۔ میوزیم میں فوٹو گرافی ممنوع تھی مگر ایک تصویر بنانے کی اجازت مل گئی۔ٹوٹی پھوٹی اشیاء شیشوں میں سجی دیکھ کر ایک تبصرہ سننے کو ملا کہ ردی والے سے خریدی گئی ہیں! ہم سب مسکرااٹھے                                                                                                                                             !

اس کے بعد سرکپ کے تین ہزار پرانے زمین سے دریافت شدہ شہر گئے۔ محکمہ آثار قدیمہ کے زیر انتظام شہر خموشاں کو دیکھ کر عجیب سا احساس ہورہا تھا۔ جن گھروں میں ہم آرام سے چہل قدمی کررہے تھے وہاں کے رہائشی بڑے کروفر سے رہا کرتے تھے آج ہمارے قدموں تلے تھے! زبر دست ٹاؤن پلاننگ نظر آ ئی۔ اور جب گائیڈ نے بتا یا کہ اسلام آباد کا شہر اسی نقشے کے مطابق بسا یا گیا ہے تو ہم سوچ میں پڑ گئے۔خیال تو ہمارے بھائی نے یہ بھی دلایا کہ کہیں بتوں اور مجسموں کو دیکھنے سے گناہ تو نہیں ملے گا؟ عبرت کی جائے دیکھ 
!کر اپنی اوقات یاد آجا تی ہے اور پھر قل سیرو فی الارض کی آیت بھی سامنے ہے

:خان پور ڈیم

یہاں سے نکل کر ہری پور ہوتے ہوئے خان پور ڈیم پہنچے۔ یہ ایک زبر دست تفریحی مقام ہے۔ یہاں ہم نے بہت لطف اٹھا یا۔ بے حد خوبصورت اور منظم، صاف ستھری جگہ ہے۔ پارک میں مختلف اقسام کے کچرے (شیشہ،لکڑی، پلاسٹک وغیرہ وغیرہ) کے لیے علیحدہ علیحدہ ڈبے نظر آئے۔ یہاں بوٹنگ سے قبل چھہ ماہ کے بچے سمیت ہم سب کو لائف جیکٹ پہنائی گئی۔ بلندی پر بنے گندھارا ہوٹل سے ڈوبتے

سور ج کا نظارہ بہت دلکش منظر تھا- شفاف پانی میں عکس یوں لگ رہا تھا جیسے رنگ گھول دیا گیا ہو! آسمان کا رنگ بھی اتنا نکھرا تھا کہ بیان سے باہر ہے! اندھیرا گہرا ہونے سے پہلے ہم نکل گئے۔راستے میں یہاں کے مشہورمالٹے بھی خریدے جو مزے، خوشبو اور رنگ میں بڑے لاجواب تھے۔ خواتین نے آرائشی چیزیں خریدنے کی کوشش کی جو مرد حضرات کے عدم تعاون کے باعث جزوی کامیاب رہی۔ واپسی میں ہم لبنٰی کے گھر واقع ڈی ایچ اے اتر گئے۔ پہلے کی طرح تھکے ہوئے پہنچے۔ کھانا کھا کر گرم گرم بستر میں گھس گئے۔ بچیاں باتیں کرتے کرتے سو گئیں تو ہماری تھکی مندی آنکھیں دیکھ کر ہمیں بھی آرام کا مشورہ ملا۔

 صبح اٹھے تو بارش کے ساتھ اولے بھی دیکھے۔ ہری ہری گھاس پر سفید نرم نرم اولے! بہت حسین منظر تھا۔ یہ جگہ بھی بہت زبر دست ہے ماشاء اللہ! دن کے اجالے میں زیادہ اندازہ ہوا۔ پہاڑ کے دامن میں غیر آباد علاقہ میں بنا بنگلہ خاصہ آرٹسٹک ہے۔ ناشتے کے بعد دوپہر کے لیے تلن کی تیاریاں تھیں مگر ہمارے سفر کے ساتھی ہمارے بغیر اداس ہونے لگے تو ہم واپس کینٹ اپنی رہائش گاہ آگئے۔